საქართველოს ახალგაზრდა იურისტთა ასოციაციამ განიხილა საქართველოს პარლამენტის იურიდიულ საკითხთა კომიტეტის მიერ  ინიცირებული საკანონმდებლო პაკეტი, რომელიც ითვალისწინებდა საქართველოს სისხლის სამართლისა და სისხლის სამართლის საპროცესო კოდექსებში, ასევე პატიმრობის შესახებ საქართველოს კანონში და სხვა კანონებში ცვლილებებისა და დამატებების შეტანას.

ასოციაციის მიერ მომზადდა და საქართველოს პარლამენტის იურიდიულ საკითხთა კომიტეტს წარედგინა დასკვნა სისხლის სამართლის საპროცესო კოდექსში შესატან ცვლილებებსა და დამატებებთან დაკაშირებით. ჩვენმა თანამშრომლებმა კომიტეტთან არსებული სამუშაო ჯგუფის ფარგლებში მონაწილეობა მიიღეს აღნიშნული კანონპროექტის შემდგომ განხილვაში და ხელისუფლებასთან მიაღწიეს კონსესუსს რამდენიმე პრინციპულ საკითხზე. აღნიშნულის შედეგად მოხდა პროექტის დახვეწა, თუმცა ამასთანავე დარჩა ისეთი საკითხებიც, რომლებიც, ჩვენი აზრით, კვლავ პრობლემატურია და საჭიროებენ გადახედვას.

საქართველოს ახალგაზრდა იურისტთა ასოციაცია შეშფოთებას გამოთქვამს იმ ფაქტის გამო, რომ დღემდე არ ხდება სასჯელაღსრულების მეხუთე საპყრობილეში მომხდარი ე.წ. ”ბუნტის” ობიექტური გამოძიება.

27 აპრილს ზუსტად ერთი თვე გადის სასჯელაღსრულების მეხუთე საპყრობილეში მომხდარი ე.წ. ”ბუნტის” შემდეგ, რომელსაც პატიმრების სიცოცხლე შეეწირა.

სამწუხაროდ, იუსტიციის სამინისტროს მაღალჩინოსანთაგან არავინ დასჯილა, არ დამდგარა სასჯელაღსრულების დეპარტამენტის ხელმძღვანელობის პასუხისმგებლობის საკითხი აღნიშნულ ფაქტთან დაკავშირებით.  თანამდებობა არ დაუტოვებია იმ საპყრობილის უსაფრთხოების სამსახურის უფროსს, სადაც პატიმრებს ცეცხლსასროლი იარაღი ჰქონდათ შენახული.

26 აპრილს საქართველოს ახალგაზრდა იურისტთა ასოციაციის აჭარის ფილიალის ოფისში შეხვედრა გაიმართა თემაზე "სიტყვისა და გამოხატვის თავისუფლება" აჭარის რეგიონში. შეხვედრას ესწრებოდნენ ბათუმში მოქმედი არასამთავრობო ორგანიზაციებისა და ადგილობრივი მედიის წარმომადგენლები. ისინი ძირითად პრობლემად აჭარის ტელევიზიის სტატუსს მიიჩნევენ. მათი განცხადებით, სანამ ტელევიზია მთავრობის საქვეუწყებო დაწესებულებაა და ბიუჯეტიდან ფინანსდება, ჟურნალისტების თავისუფლების ხარისხი ყოველთვის დადგება დღის წესრიგში.

ჟურნალისტებს პრობლემა ძირითადად პრესცენტრებთან აქვთ. მათ უძნელდებათ ინტერვიუების ჩაწერა საჯარო მოხელეებთან.

შეხვედრაზე არასამთავრობო ორგანიზაციათა და მასმედიის წარმომადგენლებმა ინფორმაციის საჯაროობის საკითხიც განიხილეს. ისინი ამტკიცებენ, რომ მათთვის ხშირად მიუწვდომელი ხდება საჯარო ინფორმაცია. არც თუ ისე იშვიათია საქართველოს კანონმდებლობით დადგენილი ვადების უგულველყოფა საჯარო ინფორმაციასთან დაკავშირებით.

28 აპრილს ამერიკის იურისტთა ასოციაციამ საქართველოს ახალგაზრდა იურისტთა ასოციაციის წარმომადგენლებს უმასპინძლა. შეხვედრაზე მოწვეული იყო საერთაშორისო ორგანიზაციებისა და საელჩოების თანამშრომლები. საქართველოს ახალგაზრდა იურისტთა ასოციაციის თანამშრომლებმა მათ საქართველოს მთავრობის მიერ პარლამენტში წარდგენილი და მეორე მოსმენით მიღებული სისხლის სამართლის კანონმდებლობაში ცვლილებათა პაკეტთან დაკავშირებული პრობლემური საკითხები წარუდგინეს.

2006 წლის 3 მაისს ჟენევაში გაეროს წამების საწინააღმდეგო კომიტეტში 36-ე სესიაზე განიხილება საქართველოს მე-3 პერიოდული ანგარიში წამებასთან დაკავშირებულ მდგომარეობაზე.  დამკვიდრებული პრაქტიკის მიხედვით, ასეთი ტიპის ანგარიშის განხილვისას მომხსენებელი  ქვეყნის არასამთავრობო ორგანიზაციებს ეძლევათ შესაძლებლობა, წარადგონონ ალტერნატიული ანგარიში.

არასამთავრობო სექტორის წარმომადგენლებს შესაძლებლობა აქვთ,  45 წუთიანი ბრიფინგის განმავლობაში გააჟღერონ  მთავარი პრობლემატური საკითხები  და შეხვდენენ წამების საკითხებზე სპეციალურ მომხსენებელს.

საქართველოს ახალგაზრდა იურისტთა ასოციაციის წარმომადგენლებმა საერთაშორისო არასამთავრობო ორგანიზაციის “მსოფლიო ორგანიზაცია წამების წინააღმეგ” ზედამხედველობით მოამზადეს ალტერნატული ანგარიში ზემოაღნიშნული კომიტეტის წინაშე წარსადგენად. ანგარიშის მომზადებაში ასევე მონაწილეობდნენ ადამიანის უფლებათა საინფორმაციო და სადოკუმენტაციო ცენტრი და საქართველოს საზოგადოებრივი ჯანდაცვის და მედიის განვითარების ფონდი.

საქართველოს ახალგაზრდა იურისტთა ასოციაციას ჟენევაში წარმოადგენს ალტერნატიული ანგარიშის თანაავტორი სოფო ჯაფარიძე.

2006 წლის 1 მაისს სასტუმრო “თორში” პროექტის “პრეზიდენტის რწმუნებული ხალხის სამსახურში” შემაჯამებელი ანგარიშის პრეზენტაცია გაიმართა. შეხვედრას ესწრებოდნენ მასმედიის, ადგილობრივი და საერთაშორისო არასამთავრობო ორგანიზაციების წარმომადგენლები. პრეზენტაციას სტუმრობდა იმერეთში პრეზიდენტის რწმუნებულის ადმინისტრაციის თანამშრომელი.

შეხვედრაზე წარმოდგენილ იქნა პრეზიდენტის რწმუნებულის ინსტიტუციური მონიტორინგის შედეგები და ფინასური მონიტორინგის ანგარიში. დეტალურად იქნა განხილული რწმუნებულის ფონდის გაურკვეველი იურიდიული ბუნება და ფონდის აღმასრულებელი დირექციის მიერ კანონდარღვევით განხორციელებული სახელმწიფო შესყიდვები. ასევე საუბარი იყო შიდა ქართლში რწმუნებულის ადმინისტრაციის მხრიდან სასამართლოს გადაწყვეტილების აღუსრულებლობასა და უფლებამოსილების გადამეტების ფაქტებზე. პრეზენტაციაზე დამსწრე საზოგადოება გაეცნო რწმუნებულის ფონდის ლიკვიდაციასთან დაკავშირებულ კანონდარღვევებს.